ابنك ما بيركزش في المذاكرة اليكي السر والحل :))

جدول المذاكرة  مشكلة عند كل بيت تقريبا كتير بيحسوا من الاهالي ان ابنهم ما بيذاكرش كفايه او مابيركزشلانه بيحب يسمع مزيكا وهو بيذاكر او بيقعد يتنطط وهو بيحفظ او بيشخبط بالقلم في كتبه 
الغريب واللي كتير من الاباء والامهات ما يعرفهوش ان ابنك  او بنتك بتحاول تذاكر بس بطريقتها 

المذاكرة وطريقتها مش اسطمبة واحدة لازم يقعد في مكان ويثبت ويذاكر وخصوصا للاعمار الصغيرة (مش زي ما احنا ذاكرنا واتعلمنا هما كمان لازم يبقوا زينا )كل طفل وله شخصيته المستقلة وطريقته في المذاكرة وكتير من الخبراء بينصحوا ان لو اتبعتي طريقة ابنك في المذاكرة وعرفتي شخصية ابنك  في الاستيعاب حتكون نتيجته في التحصيل والفهم مفأجاة بالنسبة لك

1- الشخصية السماعية :

بيحب يسمع اكتر ما يكتب ويقدر يستوعب وبحفظ اسرع لما يستخدم حاسة السمع عنده اكتر من القراءة ودول عامة بيحبوا يذاكروا بصوت عالي فسبيهم علي راحتهم وساعديه بالوسائل الصوتية للمذاكرة زي الاغاني التعليمية لتسهيل الحفظ وكمان المواقع التفاعلية التي تقدم المعلومة بالصوت والصورة معاوالكتب المسجله علي شرائط واجعليه يقرا وهو يستمع التحصيل حيكون نتيجته اسرع واحسن 

*مشكلة الشخصية دي:  هو انه سهل التشتيت واللتهاء باي صوت  اخر فالحل أما انك توفرليه موسيقي هادئة بصوت منخفض حتساعده علي التركيز او يبقي مكان مذاكرته هادئ جداااااااااااااااااا وبدون اي صوت عالي 

2-الشخصية العملية:

لو ابنك من اللي ما بيقعدوش نهائيا ولاوم يتنطط وهو بيذاكر يبي من النوع العملي مش حيفهم ويذاكر كويس الا لما تشغلي ايده اما بالكتابة او بحاجة زي اللاب بوك lap book ((وهو عبارة عن كتاب يصنعه الطفل من اوراق التلوين ويمكن عمله في كل المواد بداية من التاريخ وحتي اللغات والعلوم وليه نماذج كتير في ملف خاص في صفحة اولي ابتدائي لغات علي الفيس بووك  )) وهو سهل وبسيط ويمكن لاي سن عمله ويفضل للسن الصغير مساعدته علي قص المجسمات ووجدت الدراسات عن هذا النوع من المذاكرة ان الطفل ذو الشخصية العملية الذي يفضل ان يتعلم باللمس والتجربة يصبح افضل في التحصيل والفهم 
*ساعديه بالقراءة بصوت عالي وخليه يشاور علي الكلام داخل الكتاب وهو يقراء او يستمع 
*الهاي لاينر بالوان جاذبة يساعدهم علي التركيز اكتر وسبيه يشخبط وخطط في كتابه طالما لا يشخبط علي المادة العلية نفسها :)

*خليه يتحرك وهو بيذاكر وكمان ما نخليش وقت المذاكرة علي بعضه مثلا لو بيذاكر ساعتين في اليوم يبقي كل 1/2 ساعة اديله 10 دقائق يتحرك ويفرغ شحنة الحركة اللي عنده

*للسن الاكبر يفضل استخدامه لكرة اتفريغ الغضب المطاطية(مثل كرة سمايل المطاطية ) اثناء المذاكرة لاحتياجهم للتركيز للمدد اطول
*من الحلول لازم تدفعيه انه يكتب المعلومة اكتر من مرة حتي تثبت في عقله
*مشكلة الشخصية بتحتاج وقت كبير علشان يستوعب ولذا يجب وبشدة الحرص علي وجود جدول للمذاكرة وترحيل ساعة اديله  المواد التي تحتاج لعمل شي مثل المجسمات او اللاب بوك لاجازة اخر الاسبوع ليكون هناك الوقت الكافي 

 لعملها والاكتفاء طوال الاسبوع الدراسي بالمذاكرة بالكتابة وليس القراءة او بالحفظ وراعي ان اصحاب الشخصية دي غير صبورين تماماا علي المذاكرة فمحتاجين تكوني انتي صبورة معاهم

3- الشخصية البصرية:

وده بيحب يذاكر بعينيه يشوف المدرس بيكتب ايه علي السبورة فيستوعب اكتر ما يسمع الشرح لانه حيسرح والنوع ده بيكون جيد جدا في كتابة الملحوظات اثناء الشرح ونسبة تحصيله داخل المدرسة والفصل اعلي من البيت وده لانه بالنسبة له الوسائل التوضيحية اللي بيستخدمها المدرس وطريقة وحركة المدرس في الفصل بتشد انتباهه اكتر وتخليه يحفظ ويستوعب لدرجة انه ممكن يفتكر المدرس كان واقف فين وهو بيشرح الجزء ده من الدرس 

*مشكلة الشخصية دي :انه ما بيسمعش لو المدرس بيتكلم بس يبقي محصلته من الدرس صفر  وهنا ساعديه بانه يستخدم الخرائط والصور والاشكال والمجسمات في المذاكرة و التلوين اثناء الكتابة يساعده علي الاستيعاب بصورة اسرع
الشخصية دي بتحب تكتب واحيانا تذاكر بالرسم يعني بيذاكر مثلا تكوين السمكة فاحسن وسيلة انه يرسم سمكة ويكتب كل اجزائها عليها وبكده حيفظها بسرعة رهيبة  

من النصائح اللازمة هو جعل المذاكرة بصورة خفيه يعني ممكن تلعبي مع اولادك السلم والثعبانوتبقي فرصة انه يعرف الارقام ويقولها ويعد ويعرف اواي يعد تصاعدي وتنازلي وهكذا 
لعبة الكوتشينة في 1/2 ساعة الخاصة بالراحة تساعده علي مهارة الجمع والطرح وهكذا
لو رفض يسمع كتابة الكلمات النفترض حفظها احتفظي بمكعبات عليها كل الحروف وخليه يكون الكلمة من المكعبات وكلعبة 
ممكن يلون اشكال حيونات وخليه يقول اسمها باللغة الاجنبية سواء الانجليزية او الفرنسية اثناء التلوين وكرريها عليه وفي شكل اغنية وهكذا  

كتير من اولادنا بيستخدموا مزيج من الشخصيات التلاتة وده طبيعي وهنا لاوم عين الملاحظة القوية للام اعرفي نقط قوة ابنك في التحصيل ايه ونميها فيه وكمان في الاجازات حاولي تنمي عنده باقي المواهب التحصيلية يعني لو سمعي بس حاولي تنمي فيه الناحية العملية والبصرية وهكذا وعموما الطفل بيكون متغير في شخصيته ااستعابية للدروس ويتغير بتغير نوع المرحلة الدراسية وفي منهم بيفضل زي ما ذاكر اول يوم في اولي ابتدائي زي ما حيذاكر في الجامعة
 وعلشان كده ساعدي ابنك او بنتك انها تكون مزيج من الثلاث شخصيات حتي تكمل دراستها دائما بتفوق ونجاح باهر

وان شاء الله في المقالة القادمة جدول المذاكرة الناجح ومقوماته  وبالتوفيق لكل ولادنا وبناتنا ان شاء الله  

SHARE

About داليا سالم